Kosova ka miratuar Ligjin Nr. 08/L-056 për Mbrojtjen e Konkurrencës, me qëllim të nxitjes së një tregu më konkurrues, ruajtjes së konkurrencës së ndershme dhe, rrjedhimisht, promovimit të një ekonomie më efikase. Korniza ligjore e Kosovës, përmes rregullimit të konkurrencës, ka krijuar një mjedis të sigurt tregu që mirëpret pjesëmarrjen e bizneseve të vogla dhe atyre në zhvillim, duke siguruar mbrojtjen e tyre dhe duke u ofruar mundësi për të vepruar në treg.
Korniza ligjore i ka dhënë përparësi mbrojtjes së konkurrencës së lirë në tregun vendor, duke siguruar që bizneset të mund të ushtrojnë lirshëm veprimtarinë e tyre. Ligji Nr. 08/L-056 për Mbrojtjen e Konkurrencës është në përputhje me standardet e Bashkimit Evropian.
Shikoni dokumentin mbi mbrojtjen e konkurrencës në Kosovë (PDF)
Ligji për Mbrojtjen e Konkurrencës zbatohet ndaj të gjitha formave të parandalimit, kufizimit ose shtrembërimit të konkurrencës nga ndërmarrjet, brenda ose jashtë Kosovës, nëse veprimtaria e tyre ndikon në tregun e Kosovës.
Autoriteti kompetent për mbikëqyrjen e shkeljeve të konkurrencës në treg është Autoriteti Kosovar i Konkurrencës (AKK), i cili është institucioni kryesor përgjegjës për parandalimin e praktikave kundër konkurrencës, përfshirë ndalimin e marrëveshjeve të kartelit, keqpërdorimin e pozitës dominuese dhe kontrollin e përqendrimeve të ndërmarrjeve.
Përgjatë viteve, Autoriteti Kosovar i Konkurrencës ka qenë aktiv në nxjerrjen e vendimeve dhe shqiptimin e masave ndëshkuese ndaj subjekteve që shkelin rregullat e konkurrencës, me qëllim të mbrojtjes së konkurrencës në treg dhe sigurimit të kushteve për konkurrencë të ndershme ndërmjet ndërmarrjeve.
